सशक्त महिलांमुळेच सक्षम समाज घडतो – डॉ. संजीवनी जाधवर*
देशभक्त न्युज - कळंब प्रतिनिधी / -
शिक्षण महर्षी ज्ञानदेव मोहेकर महाविद्यालय, कळंब येथे अंतर्गत गुणवत्ता हमी कक्ष व समाजशास्त्र विभाग यांच्या संयुक्त विद्यमाने आंतरराष्ट्रीय महिला दिन उत्साहात साजरा करण्यात आला. यावेळी “सक्षम महिला, सक्षम समाज” या विषयावर व्याख्यान व महिलांचा गौरव सोहळा आयोजित करण्यात आला. प्रमुख मार्गदर्शक म्हणून डॉ. संजीवनी जाधवर (ओम बालरुग्णालय, कळंब) यांनी “सशक्त नारी – सशक्त समाज” या विषयावर मार्गदर्शन केले. महिलांचे आरोग्य, आत्मविश्वास, शिक्षण आणि समाजाच्या प्रगतीत महिलांची भूमिका अत्यंत महत्त्वाची असल्याचे त्यांनी सांगितले. महिलांनी आत्मविश्वासाने पुढे येत समाजात सकारात्मक बदल घडवून आणावेत, असेही त्यांनी नमूद केले. प्रमुख उपस्थितीत प्रा. डॉ. संजय कांबळे (सिनेट सदस्य) यांनी महिलांच्या सशक्तीकरणाबाबत विचार व्यक्त करताना "महिलांनी आपल्या हक्कांची जाणीव ठेवून स्त्री-पुरुष समानतेसाठी प्रयत्नशील राहावे" असे आवाहन केले. तसेच मनुस्मृतीसारखे प्राचीन ग्रंथ वाचून त्यातील विचार समजून घ्यावेत. महिलांनी आपले अधिकार जाणून सशक्त व्हावे, असे मत व्यक्त करण्यात आले. कार्यक्रमाच्या अध्यक्ष महाविद्यालयाचे प्राचार्य डॉ. हेमंत भगवान यांनी आपले मत व्यक्त करताना " महिला सक्षमीकरण काळाची गरज आहे, महिलांना सर्वच क्षेत्रात समान संधी मिळणे अत्यंत गरजेचे आहे, असे मत मांडले आहे. कार्यक्रमात विशेष उपस्थितीत उपप्राचार्य डॉ. कमलाकर जाधव, प्रा. जयंत भोसले व विशेष सहकार्य करणारे प्रबंधक श्री. हनुमंत जाधव यांची उपस्थिती लाभली.
या कार्यक्रमात श्री ट्रेडर्स, कळंब येथील प्रो. नवनाथ अडसूळ यांच्या सौजन्याने महाविद्यालयातील सर्व महिला शिक्षक, शिक्षकेतर कर्मचारी तसेच इनरव्हील क्लब ऑफ कळंबच्या अध्यक्षा सौ. प्रतिभा भवर, सचिव डॉ. दिपाली लोंढे, डॉ. मिनाक्षी भवर, राजश्री देशमुख यांना सन्मानचिन्ह देऊन गौरव करण्यात आला.
यावेळी अंतर्गत गुणवत्ता हमी कक्ष समन्वयक प्रा. अर्चना मुखेडकर यांना प्राप्त झालेल्या “नेशनस् प्राइड – वुमन ऑफ एक्सलन्स अवॉर्ड 2026” बद्दल विशेष सत्कार करण्यात आला. प्रस्तुत कार्यक्रम समाजशास्त्र विभाग व आयक्यूएसी विभागाच्या वतीने करण्यात आले. कार्यक्रमाचे सूत्रसंचालन सांस्कृतिक विभाग प्रमुख डॉ. दत्ता साकोळे यांनी केले. प्रास्ताविक डॉ. ईश्वर राठोड यांनी तर आभार प्रदर्शन डॉ. मीनाक्षी जाधव यांनी केले. यावेळी डॉ. वर्षा सरवदे यांनी आपले मनोगत व्यक्त केले. यावेळी महाविद्यालयातील प्राध्यापक डॉ. वेदपाठक, डॉ. अदाटे, प्रा. अंकुशराव, डॉ. ढोले, डॉ. सावंत, डॉ. साठे, डॉ. महाजन, डॉ. भोसले, डॉ. चंदनशिवे, प्रा. पालके, श्री. शिंदे, श्री. मडके, श्री. भावे शिक्षकेतर कर्मचारी व विद्यार्थी मोठ्या संख्येने उपस्थित होते. या उपक्रमामुळे महिलांच्या सबलीकरणाबाबत जागरूकता निर्माण झाली असून उपस्थितांनी कार्यक्रमाचे कौतुक केले.
